Viktorija Čmilytė – Eŭropa ĉampionino

En Tbilisi (Kartvelio) finiĝis Eŭropa Virina Ŝaka Konkurso.  Ĝin venkis litova ŝakistino el urbo Šiauliai [ŝeŭlej’] Viktorija Čmilytė.

La ora medalo  estis preskaŭ en la mano en la jaroj 2003, 2008 kaj 2010, tamen Fortuno ne favoris al Viktorija. Precipe  mankis sukceso pasintjare, kiam dum la tuta konkurso ŝi superis, tamen en la lasta partio  Pia Cramling (Svedio) forprenis de Viktorija necesan duonpoenton.

Preskaŭ la sama scenaro ripetiĝis ankaŭ en la ĉi-jara konkurso.  Inter 130 partoprenantoj de la konkurso V. Čmilytė estis la 9a laŭ Elo-koeficieno. La konkurson ŝi komencis per kvin venkoj, sed poste malvenkis al bulgarino Antoaneta Stefanova.  En la oka konkurs-etapo Viktorija perdis duonpoenton, ĉar en la ludo kontraŭ kartvelino Bela Khotenashvili estis atingita sendecida rezulto. Tamen poste sekvis venkoj kontraŭ P. Cramling kaj Ketevan Arakhamia-Grant.

Antaŭ la lasta, decida 11a partio, la titolon de la ĉampiono al V. Čmilytė garantiis sendecida rezulto kun Svetlana Matveeva  (Rusio).  Viktorija ludis per la blankaj pecoj kaj igis la konkursantinon riski. Post la deka movo la rusa sportistino mem proponis fini la partion pace.

La arĝentan medalon elbatalis A. Stefanova (Bulgario), la bronzan – Elina Danielian  (Armenio).
Al demando de ĵurnalistoj, ĉu la oran medalon oni povas nomi la plej granda atingo en ŝia kariero, Viktorija Čmilytė respondis:
– Mi opinias, ĝin oni povas taksi kiel la plej grandan atingon. Certe la venko ne estas pli malgrava ol la bronza medalo en la Monda Konkurso (2006), ĉar en  ĉi tiu Eŭropa Konkurso ludis tre fortaj ŝakistinoj.

Kiujn ŝansojn havas Viktorija Čmilytė iĝi la monda ĉampionino? Ŝia patro ŝaka trejnisto Viktoras Čmilis nur ekĝemis:
– En Litovio homoj aprecas la ŝakojn, tamen funkciuloj de la sporto strabas. Viktorija jam antaŭlonge povis venki en la monda konkurso, tamen  estas nek subteno, nek kondiĉoj. En la konkurso en Kartvelio ŝi denove partoprenis unusola, sen trejnisto. Tio estas absurdaĵo. Dume  ĉi tiu vidpunkto ne ŝanĝiĝos, estas malfacile paroli pri la monda ĉampioneco.

Por la venko en la Eŭropa Konkurso V. Čmilyte "perlaboris" ankaŭ 20000 EUR.

(Laŭ Lietuvos Rytas, Alfa.lt, 15min.lt)

Internacia ŝakturniro dediĉita al Vladas Mikėnas

La 26-28an de novembro en Vilnius okazis internacia ŝakturniro dediĉita al 100-jara jubileo de litova ŝakisto, internacia majstro Vladas Mikėnas (1910-1992).

En Vilnius  ĉi-okaze  gastis la 12a mondĉampiono Anatolij Karpov, la konkurson gratulis Garry Kasparov.

La turniron "Al V. Mikėnas – 100" gajnis internacia grandmajstro David Navara el Ĉeĥio. La duan lokon okupis internacia grandmajstro Aleksandr Ŝimanov. La tria restis rusa internacia grandmajstro Aleksandr Beliavsky, nuntempe reprezentanta Slovenion. El litovaj ŝakistoj plej bone sin prezentis internacia majstro Darius Zagorskis (la 4a) kaj internacia grandmajstro Eduardas Rozentalis (la 6a).

Dimanĉe okazis la superfinalo. En ĝia malfermo parolis: Eŭropa parlamentano, honora prezidanto de Litova Ŝaka Federacio Vytautas Landsbergis, Anatolij Karpov. La superfinalon elsendis Litova Televido.  En la superfinalo la ŝakistoj devis ludi sistemon Flohr-Mikėnas en la Angla debuto. La ĉexa grandmajstro David Navara gajnis ankaŭ la superfinalon, en kiu partoprenis ankaŭ Aleksandr Ŝimanov, Aleksandr Beliavsky, Darius Zagorskis.
En la superfinalo venkis ankaŭ la ĉeĥa grandmajstro. Anatolij Karpov enmanigis al D. Navara specialan premion – "nevenkeblajn" ŝakojn (la reĝoj neniam  perdas la ekvilibron!).

A. Karpov volas, ke la turniro iĝu tradicia kaj ĝi allogu famajn ŝakistojn de la mondo. Li strebas, ke ŝakludo reakiru perditajn poziciojn. Kiam A. Karpov aktive ludis, ŝakludo laŭ populareco rivalis kun  futbalo kaj estis pli populara ol basketbalo. Nuntempe ĝi estas malpli populara ol golfo aŭ teniso.

Vladas Mikėnas (1910-1992) estis litova ŝakisto, internacia majstro, ŝaka juĝisto de internacia kategorio, aŭtoro de libroj pri ŝakludo. Li naskiĝis en Tallinn (Estonio), en 1931 translokiĝis en Litovion. 

Dum 1931-1939 V. Mikėnas reprezentis Litovion en kvin oficialaj kaj unu neoficiala ŝakaj olimpikoj. En ĉiuj li ludis ĉe la unua ŝaktabulo.

Inter liaj venkoj estas tiuj kontraŭ mondĉampionoj A. Alekhine, M. Botvinnik, V. Smyslov, M. Tal.

Dum 1983-1985 V. Mikėnas estis ĉefa arbitracianto en la mondaj konkursoj.  Li juĝis en matĉoj G. Kasparov – Aleksandr Beliavskij,  G. Kasparov – V. Smyslov, G. Kasparov – A. Karpov.

Je nomo de Mikėnas estas nomata sistemo en la Angla debuto (sistemo de Mikėnas, aŭ sistemo de Flohr-Mikėnas, aŭ sistemo Mikenas-Carls).

Ankoraŭ unu interesa fakto: kiel diris A. Karpov, V. Mikėnas vidis ĉiujn mondĉampionojn, krom la unua.

Viktorija ČMILYTĖ – triafoja vicĉampionino de Eŭropo

Ŝakistino Viktorija Čmilytė  (Elo-nombro 2485) en la 11a Eŭropa Virina Ŝaka Konkurso (Rijeka, Kroatio) okupis la duan lokon kaj ricevis arĝentan medalon. La 26-jara ŝakistino kolektis 8,5 poentojn el 11 eblaj. Viktorija antaŭ la lasta 11a rondo je duonpoento superis svedinon Pia Cramling (2523) kaj por la ĉampiona titolo sufiĉis atingi la sendecidan rezulton, tamen ŝi, ludante per nigraj pecoj, malvenkis la decidan partion.

P. Cramling triumfis ankaŭ en la Eŭropa Konkurso en 2003. V. Čmilytė fariĝis vicĉampionino de Eŭropo jam trian fojon. Ŝi gajnis arĝentajn medalojn ankaŭ en la Eŭropaj konkursoj en 2003 (Stambulo, Turkio) kaj en 2008 (Plovdivo, Bulgario).
La bronza medalo estis enmanigita al polino Monika Soćko (2465), kiu kolektis 8 poentojn.

En ĉi tiu konkurso V. Čmilytė plenumis normon de Internacia Grandmajstro.
Pli modeste en la Eŭropa Konkurso sin prezentis litovaj viroj. Šarūnas Šulskis (2572) okupis la 108an lokon, kaj Algimantas Butnorius (2437) restis la 205a.
En la konkurso rivalis 158 virinoj kaj 408 viroj.