Esperanto en la programo de Radio Kaunas

Fragmento de la programo (el 2000 metrų, 1928, n-ro 1)

La 12an de junio Litova Radio festis gravan jubileon. Antaŭ 90 jaroj, la 12an de junio 1926 Kaŭna Radiofono per la unuaj signaloj anocis pri sia naskiĝo. En la unua elsendo Petras SPEIČYS alparolis en lingvoj litova, Esperanto, germana, angla, franca kaj rusa: "Ha lo! Ha lo! Parolas Kaunas, Litovio." kaj petis: "Kiu aŭdas nin – skribu al ni."

La 12an de junio 2016 en Kaunas, en sporthalo Žalgirio Arena okazis solena koncerto dediĉita al la jubileo. Unu el la gvidantinoj de la aranĝo rememoris pri Esperanto kaj la unua parolinto de Litova Radio: "Unu el lingvoj, en kiuj li alparolis, estis Esperanto, tamen tiuj, kiuj aŭskultas Litovan Radion kaj kompreneble vi, ĉi tie kunvenintaj, rimarkis, ke Esperanto ne dominas en etero", – kaj spicis per ironia rideto.

Tamen ĉi tiu ĉarma junulino ne menciis, ke en Kaŭna Radiofono estis regule disaŭdigataj elsendoj en Esperanto. Pri tio legu en  artikolo de Antanas POŠKA. La artikolo estas aperigita en Litova Stelo n-ro 3, 1937.

Esperanto en la programo de Radio Kaunas

Raporto por internacia konferenco Esperanto en la moderna vivo

Radio Kaunas ekkomencis uzi Esperanton en la jaro 1926 la 9-an de oktobro, okaze de funebrado pro la okupita ĉefurbo Vilnius.

La unua disaŭdigo rezultis alvokon el Polujo, kaj ĝuste la alvoko estis la sola ricevita el eksterlando. Jam dum la novembro kaj decembro de la sama jaro okazis 36 disaŭdigoj de Esperanto-lecionoj. Aliĝis laŭanonce ĉirkaŭ 300 gekursanoj, sed nur malmultaj alsendis je la kursofino skriblaborojn. De 1926 ĝis 1929 mi konstante ĉiusemajne havis esperantlingve dudekminutajn paroladetojn. Estis pritraktataj treege variaj temoj, sed tamen ĉefe el litova kultura vivo, literaturo, popolarto kaj ekonomio.

Krome okazis kvar Esperanto-solenaĵoj: la 15-an de decembro 1926 – naskiĝtago de Dr. Zamenhof, la 14-an de aprilo 1927 – mortotago de Dr. Zamenhof, la tria okazis la 6-an de majo 1928 kaj la kvara – dum aprilo 1929.

Dum la periodo de 1926.X.9 ĝis 1929.X.28 estis legitaj 103 prelegoj, entute kun la solenaĵoj 42 horoj. De 1926 ĝis 1936 mankas precizaj informoj, ĉar dumtempe estis diversaj prelegantoj, sed laŭ meza kalkulado estis disaŭdigitaj 136 prelegoj dum proksimume 45 horoj.

La tuta nombro de la disaŭdigoj ĝis 1937 jaro estas 273, kiuj sumiĝas 87 horoj.

La tuta programo de Radio Kaunas estis dividita laŭprocente: 11% da tuta vorta programo estis destinita por eksterlando en fremdaj lingvoj. Esperanto akiris 32 % de la tuta programo, destinita por fremdlando.

Pere de esperantlingvaj disaŭdigoj Radio Kaunas povis precize koni la aŭdeclimon de sia sendilo, ĉar la ricevitaj leteroj el Japanujo, Maroko, Usono kaj Egipto klare montris ĝin.

Malgraŭ ke 68 procentoj da propagandparoladoj estis en plej konataj lingvoj, kiel angla, germana, franca, rusa, pola, tamen venis el eksterlando nur ok alvokoj.

Responde al esperantlingvaj dissendoj venis 58 el diversaj Eŭropaj landoj, ekz. 25 el Germanujo, 7 el Francujo, 7 el Sovietunio, 8 el Ĉeĥoslovakujo, 4 el Anglujo, 6 el Aŭstrujo, 3 el Hungarujo, 3 el Estonujo, po du el Egipto, Svedujo, Holando, Italujo, Latvujo kaj po unu el Maroko, Java kaj Rumanujo.

Esperantlingve farita parolado alportis preskaŭ po du alvokojn, dume nur ok alilingvaj paroladoj ricevis nun alvokon.

Tiu ĉi statistiko klare pruvas, ke eksperimentado de Radio Kaŭnas brile sukcesis kaj ke esperanto estas ĝuste 20 foje pli taŭga lingvo por eksterlanda propagando, ol iu alia lingvo nacia uzata por la sama celo.

A. Poška. Redaktoro de Nia Anguleto, Radio Kaunas

La 12-13an de Decembro – la Kongreso de LEA kaj Zamenhofaj Tagoj

Kaunas (fotis Gintaras Česonis)

La 12an de decembro en Kaunas okazos la 51a kongreso de Litova Esperanto-Asocio. Post la kongreso komenciĝos tradicia ĉiujara aranĝo de litovaj esperantistoj Zamenhof-Tagoj' 2015, dediĉita al la 156a vica datreveno ekde naskiĝo de L. L. ZAMENHOF.

Konciza informo

Dato kaj loko: La 51a Kongreso de Litova E-Asocio kaj la Zamenhof-Tagoj okazos la 12–13an de decembro 2015 en Kaunas, en salono de la Instrua Centro pri Nutraĵindustrio kaj Komerco en Kaunas (str. Vilniaus 42). La loko estas en malnova urboparto de Kaunas nur je 300 metroj for de la Esperan­to-Do­mo.

Komenco de la kongreso – la 12an de decembro je la 12a h.

Registrado ĉe la enirejo en la salonon:

1. De la delegitoj kaj gastoj de la 51a kongreso de LEA – inter 9.00 kaj 11.45 h sabate.

2. Nur de la partoprenantoj de ZT-2015 – inter 15.00 kaj 16.00 h sabate.

Tagordo de la kongreso:

1. Raporto de prezidanto Povilas JEGOROVAS pri agado de Litova E-Asocio dum la jaro 2015;

2. Elpaŝoj, paroladoj, diskutoj.

Post la kongreso, t.e. la 12an kaj la 13an de decembro, okazos tradicia renkontiĝo de Litoviaj esperantistoj Zamenhof-Tagoj, dediĉita al la 156a datreveno de la naskiĝo de L. L. Zamenhof.

Malfermo de ZT-2015 – je la 16a horo sabate.

Fermo – je la 12a horo kaj 30 minutoj dimanĉe.

En la programo de  ZT-2015:

1. Solena malfermo;

2. Prelegoj pri diversaj temoj;

3. Impresoj pri la 100-a Universala Kongreso de Esperanto en Lillo;

4. Impresoj pri aliaj someraj internaciaj Esperanto-aranĝoj;

5. Junulara forumo;

6. Fakaj kunvenoj;

7. Kunveno de instruistoj;

8. Libera tribuno, diskutoj, paroloj;

9. Koncerto de partoprenantoj kaj amika vespero;

10. Abonado de Esperanto-revuoj;

11. Riĉa butiko de esperantaĵoj;

12. Aliĝo al la 101-a Universala Kongreso de Esperanto en Nitro, (Slovakio), al la 52aj Baltiaj Esperanto-Tagoj en Birštonas kaj al aliaj internaciaj Esperanto-aranĝoj en 2016;

13. Videofilmoj, lumbildoj;

14. Solena fermo;

15. Eventuale aliaj programeroj.

Kotizo ne ekzistas.

Noktado – en kutima komunloĝejo de la Edukcentro por Surduloj (str. Uosio 7) kaj/aŭ en hoteloj.

Manĝado – en kafejo de la Instrua Centro kaj eventuale en aliaj apudaj kafejoj kaj restoracioj. La partoprenantoj ricevos senpagan tagmanĝon sabate (la 12-an de decembro) en kafejo de la Instrua Centro.

Pago pro la noktado kaj manĝado – surloke. La noktadon en la komunloĝejo por ĉiuj litovaj esperantistoj pagos Litova Esperanto-Asocio.

Gastoj el aliaj urboj kaj landoj povos veni jam vendrede vespere (la 11an de decembro) kaj ekloĝi en hoteloj kaj komunloĝejoj. Vendrede de la 17a ĝis la 22a horo en la kongresejo oni deĵoros kaj direktos venintojn por noktado, informos pri ĉiuj aktualaĵoj. Venintaj sabate matene iru rekte al la salono de la aranĝo.

Laŭ informiloj  kongresa kaj Zamenhof-Taga
de Litova Esperanto-Asocio

En aŭtuna Birštonas

Unu vesperon, sur aŭtostarejo ĉe mia domo mi renkotis mian najbarinon. Ŝi ĵus elaŭtiĝis kun kelkaj sakoj plenaj da aŭtunaj bonaĵoj. Ŝi donis unu saketon al mi: "Prenu la pomojn! Ili estas bongustaj, el Birštonas!"

Birštonas estas ŝia naskiĝurbo. Tie loĝas ŝia patrino. Ŝi interesiĝis, ĉu mi iam gastis en Birštonas? Mi maljesis. La najbarino invitis: "Nepre vizitu ĝin! Estas tre bele en Birštonas!"

Tiam mi eĉ ne imagis, ke mi baldaŭ konatiĝos kun la urbo de la 52aj Baltiaj Esperanto-Tagoj.

Post kelkaj tagoj mia edzino diris, ke dum sia naskiĝtago ŝi dezirus forveturi el Vilnius. Mi ankoraŭ ne forgesis la inviton de la najbarino kaj proponis veturi al Kaunas, kaj poste al Birštonas (mi pensis: dum 2-3 horoj ni trairos la banlokon trae kaj ĉirkaŭe!). Tamen mia edzino ne entuziasmis pri Kaunas kaj ni decidiĝis vojaĝi al Birštonas kaj poste – ankaŭ al la eksa provizora ĉefurbo. Se ni havos la tempon.

Ni ne havos! Tion ni komprenis ĵus alveninte. Mi trovis, ke la urbo estas pli granda, ol mi supozis. Por konatiĝi kun ĝi dum tri horoj, ni devus galopi antilope!

Nia ekskurso komenciĝis en la busa stacio. Baldaŭ mi ekvidis la unuajn „konatojn“ – la daliojn Birštonas, kiuj ankoraŭ floris. Ilian historion oni povas legi en Barelo.

La dalioj ne estas unusolaj floroj en la urbo. Ankaŭ multaj aliaj ankoraŭ konkuras per la koloroj kontraŭ pentristo Aŭtuno, kiu jam kolorigis arbajn foliarojn.

La unua celo estis la rivero Nemunas. Ĝis nun mi vidis ĝin nur tra busa fenestro. La bordo estas ideale ordigita: estas bona pado por piedirantoj kaj biciklantoj. Se vi laciĝis, eksidu su benkon kaj ripozigu la okulojn rigardante al kvieta fluado de akvo aŭ al floroj sur la bordo. En la flanko de la Centra parko ankaŭ oni povas trovi ion interesan. Ni atentis la pinon, kies larĝeco okulfrapis. Okazas, nome per ĝi la arbo famas. La alto de la pino estas 9 metroj kaj la larĝo de ĝia branĉaro preskaŭ duoblas. La arbo estas registrita en la listo de protektataj monumentoj de la naturo.

Apud sanatorio Eglė ni rimarkis rotondon. La elpendaĵa surskribo biuvetė (ruse бювет, de la franca buvette) nenion diris al ni pri destino de la rotondo. Traleginte la klarigon, ni eksciis, ke tiel nomiĝas konstruaĵo, konstruita sur mineralakva fonto. Mi ne trovis esperantlingvan analogaĵon de la termino (eble mineralakva kiosko?). Ĉi tie oni povas gustumi mineralakvon, kiel ankaŭ en la flava dometo en la parko de Vytautas. 

Apude ni ekvidis ankoraŭ unu rondan konstruaĵon, sentegmentan. Ĝia cilindra muro estas farita el kunplektitaj maldikaj branĉoj. Tio estas mineralakva vaporigilo. Ĝi estigas efikon de mara aero. La vaporigilo estas lanĉita ĉi-jare en majo. 

Nia itinero direktiĝis al la Centra parko. Ĝi estas la arbaro, transformita al la parko. Sportamantoj  povas elekti la padon kun diversaj instalaĵoj por ekzerciĝi kaj ludi sportludojn, apudestas placetoj por infanaj ludoj. Por tiuj, kiuj preferas malpli aktivan ripozon, povas promeni sur la pado de skulptaĵoj kaj pririgardi artaĵojn de famaj litovaj skulptistoj. La ideo krei el la arbaro la parkon, naskiĝis en 2008. Dum la jaroj 2007-2013 la parko estis kreita. Ĝi okupas areon de 25 ha. Eŭropa Unio al ĉi tiu projekto asignis ĉ. 1 600 000 €. La parko estas plu renovigata. En 2014 skulptisto Stasys ŽIRGULIS en la parko malfermis ekspozicion el 10 skulptaĵoj.

En la parko troviĝas malgranda malnova tombejo. Ĝi jam ne funkcias pli ol 50 jarojn. En ĝi min atentigis modesta tomba monumento, kiu prezentas la krucon ŝose elkreskitan el la stumpo de forsegita arbo. Estas kelkaj tiaj monumentoj en la tombejo. La monumentoj estas faritaj el feraj tuboj.

Unu tombo troviĝas ekster la tombejo, apud la barilo. La surtomba surskribo anoncas, ke ĉi tie estas enterigita Antonio Ŝimanski (Schymanski), kiu naskiĝis en 1856 kaj mortis en 1911. Oni rakontas, ke li estis pia, bonkora homo. Li ne estis katoliko. Lia morto estas fiksita en neniaj arkivaj dokumentoj. Pri la tombo estas konataj kelkaj historioj. La plej konvinka estas tiu de Evelina MAČIULIONYTĖ, kiu defendis bakalaŭran laboron pri la malnova tombejo de Birštonas. Laŭ ŝi, en 1911 en Birštonas ripozis poldevena germana oficiro A. Ŝimanski. Li komencis amrilatojn kun juna litovino Marytė [Marite]. Ŝi laboris en la ripozdomo (kurhaŭzo) de Birštonas. Ĉe la fino de la libertempo, li svatiĝis al sia amatino, sed ŝi ne deziris edziniĝi al li. Eĉ pli multe - ŝi trovis alian viron kaj perfidis la oficiron. La enamiĝinta Antonio sin mortpafis sur la ŝtuparo de la ripozdomo. La fraŭlino, volante elaĉeti sian kulpon, enterigis la oficiron kiel sinmortiginton ekster la tombejo kaj starigis al li la monumenton. Kaj en Birštonas ŝi neniam plu aperis.

Post mallonga tagmanĝa paŭzo sur parka benko, ni ekskursis pluen. Ni deziris trovi la sanatorion Versmė, en kiu estos la sidejo de BET-52 en junio 2016. Dumvoje ni preteriris la monumentan ŝtonon de Birštonas. Sur ĝi estas elĉizitaj tri datoj: la jaro 1382, kiam en analoj de krucistoj estas unuafoje menciita la nomo Birštonas; la jaro 1846, kiam estis fiksita fakto pri resanigo de homoj per mineralakvo, tial ĉi tiu jaro estas akceptita kiel la jaro de fondo de la kuracloko; la jaro 1966, kiam al Birŝtonas estis donitaj rajtoj de la respublika urbo. Do, en 2016 la urbo festos la 50-jaran jubileon!

Kaj jen la sanatorio Versmė. Vere, la konstruaĵo mem kaj ĝia ĉirkaŭaĵo impresas.

En la parko de Vytautas precipe klare estas sentata aŭtuno. Pri ĝi signalas la aleoj kovritaj de folioj, buntkoloraj arbaj foliaroj. 

La parko de Vytautas estas la malnova teritorio de la kuracloko. Grandbienulo Ignacijus KVINTA el Jieznas en 1874 aĉetis la kuraclokon kaj komencis fondi la parkon. En la inter-mondmilito la parkon prizorgis profesiaj ĝardenistoj el Dotnuva. En 1926 estis instalita fontano en la parko. La aleojn kunigis florbedoj. Ĉiu-tage en la speciala parka pavilono koncertis orkestro. Apud la flava mineralakva kiosko floradis eksterordinara florejo Kalendaro. En ĝi ĉiu-tage estis plantataj floroj, kiuj formis diverskoloran daton de tiu tago. 

Hodiaŭ la parko jam ne povas memlaŭdi pri sia iama beleco. Postrestis nur restaĵoj de la aleoj. Tamen mi vidis, ke estas konstruataj domoj. Eble iam la parko estos renovigita kaj rericevos la estintan famon?

Ni suriris la kastelmonton de Birštonas (la monton de Vytautas). De sur ĝi ni admiris pitoreskan pejzaĝon kun Nemunas.

La kastelmonto de Birštonas estas unu el plej altaj (la dekliva alto atingas 40 m) kaj plej famaj kastelmontoj de Litovio. En fino de la 14a jc. sur la kastelmonto staris ligna kastelo de Birštonas (en historiaj fontoj ĝi estas unuafoje menciita en 1382), kiu estis parto de defenda limo de duklando de Trakai kaj unu el ĉasadaj grandbienoj de Vytautas la Granda. Krucistoj multfoje sturmis la kastelon, sed neniam ĝin venkoprenis.

Nia ekskurso proksimiĝis al la fino. Ni bonege ripozis. Ni rimarkis, ke ĉiu objekto kvazaŭ haltigas nin, ne permesas rapidi. La urbo, ĝia beleco, flirtanta kvieteco tre plaĉas al ni. Plej trafe pri Birštonas komplimentis mia edzino: "Mi deziras ĉi tie loĝi!"

Ni ne ĉion ekvidis.  Ni esperas daŭrigi la ekskurson. Eble dum BET-52 en somero 2016?

Al Vinius ni revenis per la lasta buso.

Fotojn pri Birštonas aŭtuna oni povas vidi ĉi tie.

Birštonas havas sian dalion

La litova kuracloko Birštonas iĝis la unua urbo de Litovio, je  kies nomo estas nomita la nova flora specio.

La novan rason de dalioj, nomitan je nomo de la urbo, donacis selektistino Rita ZALA el Valmiera (Latvio). La fama floristino estas bone konata ne nur en ŝia lando – novaj daliaj specioj, selektitaj de ŝi, gajnis la duan kaj trian lokojn en Pariza konkurso de daliaj kultivistoj. Por la eksterordinara donaco de la latvino, birŝtonanoj devas danki al ĥorestro Rasa GELGOTIENĖ, kiu estas ankaŭ kultivantino kaj kolektantino de dalioj. En tradicia Festo de Dalioj, kiu jam kelkajn jarojn estas organizata septembre en Birštonas, ŝi prelegis pri kultivado de dalioj kaj proponis organizi interŝanĝajn bazaretojn daliajn. Ŝi rimarkis, ke en la najbara lando Latvio kultivistoj de dalioj estas pli "fortaj". Ŝi helpis al la birŝtonaj  amantoj de dalioj kontakti kun R. Zala. Sinjorino R. Zala interrete konatiĝis kun Birštonas kaj ekvidinte la flavan balenidon en la urba blazono decidis unu freŝe selektitan specion de dalioj nomi je la nomo de la urbo.

Ĉi tiuj dalioj longe floras kun flavaj, oranĝe nuancitaj floroj,  ĝis 10 cm en la diametro. La unuaj 3 radikaj tuberoj en aprilo de 2013 estis venigitaj en Birštonas.  Ili estis plantitaj ĉe la skulptaĵo Knabino kun meduzo de Bronius Vyšniauskas, apud la konstruaĵo de Birŝtona municipa administrejo. En 2014  Turisma Informada Centro de Birštonas organizis fotokonkurson dediĉitan al la dalio Birštonas. La konkurson gajnis  Jurgita KLEIZIENĖ el Birštonas (La foton vi vidas).

La daliaj festoj en Birštonas okazas ne hazarde. Ĝiajn fonton loĝantoj de Birštonas rilatigas kun la nomo de verkisto, doktoro pri medicino Stanislav MORAVSKI (Stanislaw Morawski, 1802-1853). Li estis posedanto de grandbieno  Ustronė en la ĉirkaŭaĵo de Birštonas. Nome li  proksimume en la jaro 1835 venigis daliojn en sian bienon el Sankt-Peterburgo kaj komencis ilin kultivi. En la daŭro ĉi tiuj floroj disvastiĝis en litovaj bienoj kaj fariĝis la necesa ornamo de floraj ĝardenetoj .

Partoprenantoj de  la 52-aj Baltiaj Esperanto-Tagoj verŝajne ankoraŭ ne vidos  la florantajn daliojn Birštonas, ĉar en Litovio daliojn oni nomas Telegramo aŭtuna (cetere, nuntempe eble jam ne ĉiuj scias, kio estas telegramo; eble ni diru: La dalio estas la unua SMS-mesaĝo aŭtuna?), tamen kiu scias? Ja la unua burĝono de la dalio Birštonas en la jaro 2013  malfermiĝis interalie en la unuaj tagoj de junio.

La 60-a datreveno de Povilas Jegorovas

En BET-49 (Utena), fotis Taesok

Hodiaŭ, la 11an de marto Prezidanto de Litova Esperanto-Asocio Povilas JEGOROVAS festas la 60-an datrevenon de sia naskiĝo. 

Povilas, al demando, kio estas por Vi Esperanto, Vi respondas, ke ĝi estas pli ol hobio. Vere estas tiel. Esperanto estas Via Vivo.  Dankon, Povilas, al Vi  por tio.

Fragmento el  interparolo de Povilas JEGOROVAS kaj Kristina SAKAITĖ.  La intervjuo en 2010 estis publikigita en gazetoj Utenos Žinios, Valstietis. 

Kial la ideo de internacia lingvo estas tiel grava al Vi? Ĉu Vi kredas, ke Esperanto povas iĝi helpa lingvo de ĉiuj nacioj?

Estas grave,  ĉar tio estas bona ideo.  Ni ne havas celon, ke ĉiuj homoj scipovu nur ĉi tiun lingvon.  Iuj kritikas nin, ke ni volas ekstermi ĉiujn lingvojn kaj lasi nur unu – tio estas absurdo.  Ni volas, ke la homoj, kiuj bezonas kontaktojn, komunikiĝon, scipovu ĉi tiun lingvon kaj ke ĝi estu reale uzata.

Multaj eble diros, ke tio estas utopia celo, tamen vere  ne estas tiel.  Nuntempe iuj nacioj estas superaj nur pro tio, ĉar ilia lingvo dominas.  La mondo parolas angle, tamen tio signifas nenion. La historio evoluas meandre. Esperanto estas internacia interkomunikado demokrata kaj egalrajta.  Tio signifas, ke ĉiuj devus esti  en la sama nivelo komencante  lerni  la lingvon mondskale funkciantan.

Esperantistoj estas nestandartaj homoj, ĉar ili iras kontraŭflue. Ĉio angliĝas kaj kosmopolitiĝas.  Povas ŝajni, ke ni estas por kosmopolitismo, sed reale ni ne volas neniigi naciajn lingvojn. Ni nur volas helpi al la nacioj interkomunikadi unu kun la alia. Tial Esperanto estas nomata helpa lingvo internacia, kiu helpas  komunikiĝi inter si al homoj de diferencaj kulturoj, religioj, rasoj.

Ĉu riproĉoj pro artefariteco estas ĉefa obstaklo, ke la lingvo iĝu populara?

Iuj lingvistoj asertas, ke tia lingvo ne povas ekzisti, ĉar ĝi ne estas nacia. Tamen praktiko jam kontestis tion. Alia stereotipo estas, ke ne eblas krei la lingvon. Tamen eblas.

Alia obstaklo estas konkurenco, ĉar tio ne estas afero ŝtata, kaj socianoj ne havas tiujn eblecojn, kiujn havas instruado de fremdaj lingvoj ŝtate subtenata kaj financata.

Prognozu, kiam Esperanto estos helpa   kaj  la dua lingvo por ĉiuj nacioj?

Ankoraŭ ne baldaŭ, mi tion ne ĝisatendos, ĉar oni devas paroli ne nur pri la lingvo, sed ankaŭ pri evoluo de la mondo.  Angla  lingvo estas grava nur ĝis tiam, ĝis kiam estas gravaj angle-parolantaj ŝtatoj: Usono, Britio, parte Aŭstralio.  Dum plej proksimaj 10 jaroj povas ŝanĝiĝi la situacio, pezocentroj de la mondo.

Eble tiam aperos bezono de la internacia lingvo. Dume tio aspektas kiel utopia varianto, sed iam utopioj realiĝas.

La Baltiaj Esperanto-Tagoj revenos al Birštonas

Blazono de Birštonas

La tradiciaj 52-aj Baltiaj Esperanto-Tagoj  (BET) okazos en Birštonas la 2-10an de julio, 2016. 

Litova Esperanto-Asocio (LEA) anoncis pri la aranĝo  unuafoje  tiel frue (antaŭ unu jaro kaj 9 monatoj).

Birštonas al eksterlandaj  esperantistoj ne estas Terra incognita, ĉar ĉi tie en 2004 okazis  BET-40. Tiam LEA jam  plenforte sin preparis al Vilna Universala Kongreso (2005), tial estis maksimume  uzataj  ĉiuj eblecoj propagandi  Esperanton.

Emblemo de BET-40

En la aranĝo partoprenis 257 samideanoj el 17 landoj. La kunvenon skribe salutis prezidanto de UEA  Renato CORSETTI, provizora prezidento de Litova Respubliko Artūras PAULAUSKAS. La kunveno havis riĉan programon.  Halina GORECKA en La Ondo de Esperanto   citas  ĝeneralan direktoron de UEA Osmo BULLER, ke la 40aj BET por litovaj esperantistoj iĝis "kvazaŭ malgranda ĝenerala provo de UK".  Pri ĉi tiu jam historia evento  oni povas legi ankaŭ en Litova Stelo, n-ro 4, 2004, en retejo de LEA esperanto.lt .

Okaze de ĉi tiu aranĝo estis eldonita gvidlibro Birštonas. Perlo ĉe Nemunas.  La libreto estos aktuala kaj utila ankaŭ por BET-anoj de la jaro 2016.

Do, en 2016 ĉi tiu belega urbeto denove gastigos esperantistojn.  La aranĝo okazos la 2-10-an de  julio.
Venu kaj aktive partoprenu en la BET! Birštonas akceptos vin bondezire kaj ankoraŭ pli bela ol en 2004.

Pri BET-52 oni povas legi pli detale en Barelo kaj en
esperano.lt

Koncize pri blazono de Birštonas.

Ĝis la jaro 1959 malgranda skulptaĵo de balenido, el kies buŝo fluis minerala akvo, markis fonton de minerala akvo Vytautas. Post konstruigo de Kaŭna akvo-energia centralo, rivero Nemunas subakvigis la skulptaĵon, tiutempan simbolon de la kuracloko. La legenda baleno renaskiĝis en la blazono. Fantasta fiŝo, el kies dorso ŝprucas akvo, estas kvazaŭ baleno, sur kiu sin bazas  pasinteco kaj estonteco de la kuracloko.
Aŭtoro de la blazono – pentristo Arvydas KAŽDAILIS


Ĉi tiu video partoprenas en projekto Prezentu urbon Birštonas al Eŭropo

La Pentekosta prediko – pri Esperanto

Pentekosto (Ivelisse Colon-Nevarez, Porto-Riko)

La Pentekosto. Ĝi estas tre grava festo por kristanoj de la mondo. Ĝi memorigas alsendon de la Sankta Spirito en la Teron por alporti al la homoj spiritan Pacon, reciprokan komprenemon, amon.

Pri tio predikas sacerdoto Marius dum la Pentekosta meso en Vilna arkikatedralo. Li parolas ankaŭ pri malfacilaĵoj, kiuj malhelpas kompreni unu la alian, interkomunikadi,  pri lernado de fremdaj lingvoj. Ŝajnas, ni aŭskultas ordinaran predikon. Kaj jen mi ekaŭdas pri doktoro  Ludoviko Zamenhof, kiu loĝis en Bjalistoko, iomete laboris en Veisiejai, kreis artefaritan lingvon Esperanto. Neatendita kaj interesa ŝanĝo de la predika temo!

Sacerdoto Marius ŽITKAUSKAS (fotis Zeneka)

Sacerdoto Marius longe rakontas al granda aŭditorio de preĝantoj pri tio, kiel Ludoviko Zamenhof (poste konata ankaŭ kiel  Doktoro Esperanto), jam en la infaneco spertis problemojn de mis-komunikado kaj kreis la lingvon internacian, facile ellerneblan. Finante la predikon, sacerdoto Marius komparis Esperanton kun lingvo de la Amo alsendita de la Sankta Spirito.

Ĉu multaj aŭskultantoj komprenis ion? Tamen kiel multe da bonaj vortoj estis diritaj al la internacia lingvo!

La sekvantan tagon mi dankis al la sacerdoto ne nur je nomo mia,  sed ankaŭ je nomo de esperantistoj. Mi ekinteresiĝis, ĉu li estas esperantisto? Ne, li ne scipovas Esperanton. Somere 2012 li partoprenis en junulara katolika tendaro en Šventežeris-paroĥo (distrikto Lazdijai). La tendaranoj ekskursis al Veisiejai kaj tie li eksciis pri Zamenhof kaj Esperanto.

Sacerdoto Marius afable ekmiris, ke lia prediko memorfiksiĝis.

Audronė MAKSIMAITIENĖ  (Vilnius)

Inter honoritaj kaŭnanoj estas ankaŭ Povilas Jegorovas

La 10an de marto 2014 urbestro Andrius KUPČINSKAS en Kaŭna Urbodomo enmanigis honoraĵojn al grupo da meritaj kaŭnanoj por ilia eksterordinare persista kaj konscienca laboro, socia agado kaj meritoj al la urbo.

Honoraj insignoj Santaka* (duagradaj) estis enmanigitaj al  

Danutė ČERNIUVIENĖ (membro de komunumo Lampėdžiai pro aktiva agado kaj evoluo de komuneco en  la komunumo),

Algirdas JURKŠA (longdaŭra prezidanto de Kaŭna surdula klubo Tyla (Silento), korbopilka trejnisto de  teamo de surduloj),

Kęstutis NAVAKAS (poeto, esisto, tradukisto, laŭreato de Nacia Premio de Kulturo kaj Arto).

Honoraj insignoj Santaka (triagradaj) estis enmanigitaj al

Kęstutis Derliūnas (sociano, membro de Litova Societo pri Atlantika Traktado, por socia agado kaj diversaj civitanaj iniciatoj en kampoj memregada kaj kultura),

Povilas JEGOROVAS (Prezidanto de Litova Esperanto-Asocio, kiu per sia solida intelekto signife kontribuis al popularigo de Esperanto en Litovio kaj al konigo de Kaunas en la monda  komunumo  esperantista),

Indrė JUČAITĖ  (arta gvidantino de internacia ĵaza festivalo Kaunas Jazz por altnivelo de la festivalo, kiu mondskale famigas ne nur urbon Kaunas, sed ankaŭ Litovion),

Valdas KUBILIUS (inĝeniero, fleganto de etnokultura heredo, organizanto de kulturaj projektoj),

Darius ŽUKAUSKAS (subestro de Ĉefa Polica Komisarejo de Kaŭna Regiono).

Arĝentitaj medaloj de Kaŭna urbestro de Jonas VILEIŠIS estis enmanigitaj al

d-ro Aušra ABRAITIENĖ (vicdirektoro de Centro de Fizikaj kaj Teknologiaj Sciencoj ĉe Ŝtata Sciencesplora Instituto), Rolandas MALAIŠKA, pedagogoj Stanislovas MILAŠIUS, Virginija RUPAINIENĖ, Virginija SAKALAUSKIENĖ.

--
*Santaka - kunfluejo

(Laŭ Kauno Diena, Kaunas.lt, 15min.lt)

En Litovio denove koncertos Andrej Korobeinikov

Fotis Irene Zandel

Unu el plej bonaj orkestroj de la mondo Kremerata Baltica (artgvidanto Gidon KREMER)  venas en Litovion kun tre interesaj muzikistoj kaj programoj. La 11an de marto en salono de Universitato de Vytautas la Granda (Kaunas), kaj la 12an de marto en Nacia Filharmonio (Vilnius) la kolektivo prezentos fenomenan rusan pianiston 28-jaraĝan Andrej KOROBEINIKOV

A. Korobeinikov estas laŭreato de pli ol 20 naciaj internaciaj konkursoj. Al li aplaŭdegis la publiko en famaj koncertejoj de Parizo, Londono, Berlino, Amsterdamo, Vaŝingtono, Tokio, Sankt Peterburgo kaj Moskvo. Monda gazetaro gloras lin por liaj eksterordinaraj muzikeco, intelekto kaj kapabloj.

Andrej naskiĝis la 10an de julio 1986 kaj kreskis en komuna loĝejo de  prestiĝa supera lernejo Fizteĥ (Moskva Fizika - Teknika Instituto), kie studis lia patrino Liubovj Nikolajevna Korobeinikova.

Komence ĉiuj pensoj kaj planoj estis nur pri fiziko, kaj pri tio, kiel trovi ion por manĝi dum tiama perestrojka tempo. Kiam  Andrej estis trijarulo, oni rimarkis, ke la "estonta fizikisto" ne povas elparoli duonon da konsonantoj de la gepatra lingvo. Oni decidis konduki lin en koruson de najbara Junpionira Domo. Andrej tie, kiel ekzamenpruvon, kantis senakompane kanton de Sergej NIKITIN Переведи меня через майдан... (Konduku min tra la majdano). Pedagogo Jelena Jevgenjevna Kokoreva decidis, ke la knabo devas okupiĝi je fortepiano. Andrej komencis ludi je ĉi tiu muzikilo ekde 5-jara aĝo.

Dum 1992-97 Andrej lernis en Centra Meza Speciala Muzika Lernejo ĉe Moskva Ŝtata Konservatorio (en klaso de pedagogo Nikolaj A. Toropov) kaj en Muzika Infan-lernejo je nomo Dunaevskij (klaso de Natalja J. Sanoviĉ).

En 2001 finis Moskvan Regionan Superan Artlernejon.

En 2006  Andrej  Korobeinikov 19-jaraĝa (kiel ankaŭ Sergej Raĥmaninov),  finis Moskvan Ŝtatan Ĉajkovskij-Konservatorion kun ora medalo.

En 2006 li eniris  Londonan Reĝan Superan Muzikan Lernejon (Royal College of Music) kaj en 2008 perfektrezulte finis tie doktoriĝajn studojn.

Paralele en 1998 A. Korobeinikov eniris Juran fakutaton en Eŭropa Universitato de Justico (Moskvo), kiun li finis perfektrezulte en 2003.

Rektoro de la universitato Gennadij Miĥajloviĉ ŜILO tiel  memoras la unuan renkontiĝon kun Andrej.

Somere 1998 venis al mi kun la infano, dekjara miaopinie, la virino, laŭaspekte subpremita kaj nekomunikema. Ŝi diris:
– Gennadij Miĥajloviĉ, mia filo tre volas iĝi juristo. Mi sola edukas lin. Mi laboras kiel kortistino. Mi ne povus pagi por la studoj. Ĉu vi ne povus iel helpi?
– Ni estas en komplika materiala  situo, – mi respondas. – Tamen distingindajn gejunulojn ni instruas senpage. Ĉu vi havas ordinaran infanon?
– Jes, tamen li ion kapablas. Eble vi povus interparoli kun li.
– Bone. Alkonduku lin, ni interparolos.
– Jen, li staras ĉi tie.
– Kion? Vi mokas min! Li ja estas ankoraŭ infano. Ĉi tie estas la universitato, sed ne mezlernejo.
– Vi scias, li jam trapasis mezlernejan programon.
– Via nomo? Kia estas via aĝo? – mi turnas min al la knabo, kiu estis malgranda eta, maldika.
– Andrej, dekunujara. – Altvoĉe respondas la etulo.

Korobeinikov ravis la rektoron. Li akceptis lin en la universitaton kaj asignis al la talenta knabo750-rublan stipendion.

Dum 2003-2004 A. Korobeinikov instruis en ĉi tiu universitato, publikigis kelkajn sciencajn artikolojn pri rajtaj problemoj de artistoj-plenumantoj. En 2005 li komencis doktoriĝajn studojn  en Jura fakultato de Moskva Štata Lomonosov-Universitato, tamen aktiva koncerta agado ne permesis fini  doktoran disertacion.

Andrej estas ankaŭ esperantisto, eĉ tiu "ĝisosta", kiel estas skribite en unu retejo. En multaj intervjuoj, parolante pri sia muzika agado, li ne forgesas mencii, ke li estas esperantisto. En du  Universalaj Kongresoj de Esperanto (Göteborg, 2003 kaj Beijing, 2004)  A. Korobeinikov iĝis laŭreato de dua premio de Oratora Konkurso. Dum siaj koncertaj vojaĝoj Andrej Korobeinikov ekuzas okazon por renkontiĝi kun lokaj esperantistoj.

Andrei Korobeinikov - Liszt, Consolations S 172

La 49a Kongreso de Litova E-Asocio kaj la Zamenhof-Tagoj en Kaunas

La 14an de decembro en Kaunas  okazos  la 49a kongreso de Litova Esperanto-Asocio. Estraro de la Asocio en la informilo ne substrekis la punkton de la tagordo pri elektado de la Estraro kaj de Prezidanto. Do, la kongreso estos grava. Litoviaj esperantistoj povos taksi laboron de la malnova Estraro kaj aktive partopreni en elektado de la novaj Estraro kaj Prezidanto, ĉar ĉiuj partoprenantoj havos balotrajton.
Post la kongreso okazos Zamenhofaj Tagoj‘ 2013.

Konciza informo
Dato kaj loko: La 49a Kongreso de Litova E-Asocio kaj la Zamenhof-Tagoj okazos la 14–15an de decembro 2013 en Kaunas, en la Malgranda salono de la Universitato Vytautas la Granda (str. S. Daukanto 28). La loko estas en la centra urboparto de Kaunas. Ĝi estas facile atingebla de diversaj flankoj.

Komenco de la kongreso – la 14an de decembro je la 12a h.

Registrado ĉe la enirejo en la salonon:
1. De la delegitoj kaj gastoj de la 49a kongreso de LEA inter 9.00  kaj 11.45 h  sabate.
2. Nur de la partoprenantoj de ZT-2013 inter 15.00  kaj 16.00 h sabate.

Tagordo de la kongreso:
1. Raporto de prezidanto Povilas JEGOROVAS pri agado de Litova E-Asocio dum la jaro 2013. 
2. Elpaŝoj, paroladoj, diskutoj.
3. Elektado de Estraro kaj de Prezidanto de Litova Esperanto-Asocio.

Post la kongreso, t.e. la 14an kaj la 15an de decembro, okazos tradicia renkontiĝo de Litoviaj esperantistoj Zamenhof-Tagoj, dediĉita al la 154a datreveno de la naskiĝo de L. L. Zamenhof.

Malfermo de ZT-2013 – je la 16a horo sabate.
Fermo – je la 12a horo kaj 30 minutoj dimanĉe.

En la programo de de ZT-2013:
1. Solena malfermo;
2. Proklamo de la Esperantisto de la Jaro 2013;
3. Prelego de Aleksander Korĵenkov Antaŭ cent jaroj: Zamenhof en la 1913a jaro.;
4. Prelego de Halina Gorecka pri la romano La legisto de Bernhard Schlink;
5. Impresoj pri la 98a Universala Kongreso de Esperanto en Rejkjaviko;
6. Impresoj pri aliaj someraj internaciaj Esperanto-aranĝoj;
7. Junulara forumo;
8. Fakaj kunvenoj;
9. Kunveno de instruistoj;
10. Libera tribuno, diskutoj, paroloj;
11. Koncerto de partoprenantoj kaj amika vespero;
12. Abonado de Esperanto-revuoj;
13. Riĉa butiko de esperantaĵoj;
14. Aliĝo al la 99a Universala Kongreso de Esperanto en Bonaero (Argentino), al la 50aj Baltiaj Esperanto-Tagoj en Jelgava (Latvio), al la 10a kongreso de Eŭropa Esperanto-Unio en Rijeka (Kroatio) kaj al aliaj internaciaj Esperanto-aranĝoj en 2014;
15. Videofilmoj, lumbildoj;
16. Solena fermo;
17. Eventuale aliaj programeroj.

Kotizo ne ekzistas.

Noktado – en la kutima komunloĝejo de la universitato Aleksandras Stulginskis (str. Gustaičio 6) kaj/aŭ en hoteloj.

Manĝado – en la kafejo de la universitato kaj eventuale en aliaj apudaj kafejoj kaj restoracioj. La partoprenantoj ricevos senpagan tagmanĝon sabate (la 14an de decembro ) en la kafejo de la universitato Vero Cafe.

Pago pro la noktado kaj manĝado – surloke. La noktadon en la komunloĝejo por ĉiuj litovaj esperantistoj pagos Litova Esperanto-Asocio.

Gastoj el aliaj urboj kaj landoj povos veni jam vendrede vespere (la 13an de decembro) kaj ekloĝi en hoteloj kaj komunloĝejoj. Vendrede de la 17a ĝis la 22a horo en la kongresejo oni deĵoros kaj direktos la venintojn por noktado, informos pri ĉiuj aktualaĵoj. Venintaj sabate matene iru rekte al la salono de la aranĝo.

Oficialan informon pri la 49a kongreso de Litova Esperanto-Asocio oni povas trovi ĉi tie.
Oficialan informon pri Zamenhof-Tagoj oni povas trovi ĉi tie.
Pri Zamenhof-Tagoj legu ankaŭ en La Balta Ondo.

BET-49 sukcesis!

Komuna foto post inaŭguro de BET-49
(Fotis Taesok Choe)

Finiĝis la 49-aj Baltiaj Esperanto-Tagoj.  Oni povas konstati, ke la tradicia esperantista aranĝo sukcesis. En la BET'on venis 216 efektivaj partoprenantoj el dudeko da landoj.  Al ili BET-49 proponis riĉan kaj interesan programon: prelegojn, kursojn, koncertojn, ekskursojn ktp.  Eĉ la vetero estis agrabla – nek tro malvarma, nek varmega, kvankam  en Litovio  somere ofte  oni ŝatas citi versojn de poeto Eduardas MIEŽELAITIS:  Ĉi tie estas Litovi‘, ĉi tie pluvoj falas (Čia – Lietuva, čia lietūs lyja...). 
Halina GORECKA en novaĵretejo La Balta Ondo pri BET-49 skribas:  Laŭ ĉiuj aspektoj, kiuj gravas al mi, la 49a, okazinta la 6–14an de julio 2013 en Utena estis la plej bona. Ĉu ideala? Probable jes! Dankon al Halina por la laŭdaj vortoj!  Siajn impresojn  pri BET-49 Halina  detale  rakontis en La Balta Ondo.  

La novaĵretejo estis kvazaŭ ambasadoro de la 49-aj Baltiaj Esperanto-Tagoj.  Multaj artikoloj pri la programo, proceso de preparaj  organizaj laboroj gardis  la partoprenontojn kontraŭ  risko aĉeti  katon en la sako. 

Laboro finita, ripozo merita
(Fotis Anna Striganova)

Bona rezulto  ne eblas sen granda laboro. Ĉeforganizanto de BET-49 prezidanto de Litova Esperanto-Asocio Povilas JEGOROVAS minimume  duonjaron aktive okupiĝis pri aferoj de la okazontaj Baltiaj Esperanto-Tagoj.  BET-49 estis la 12a, kiun organizis Povilas.  Kiel oni povoas kompreni el intervjuo en informilo de BET-49 Heroldo de Utena, la prezidanto esperis pli grandan nombron de la partoprenantoj.  Lin mirigis, ke el  najbara Polando aliĝis nur du personoj.  Tamen kiel li diris,  gravas ne nombro, sed kvalito.  Halina Gorecka rimarkis, ke laŭ programo BET-49 similis al Universala Kongreso.  Tamen Aleksander KORĴENKOV dubas, ĉu tia tendenco estas bona: Litoviaj BET‘oj fariĝas ne forumoj de baltaj esperantistoj, sed internaciaj Esperanto-kongresoj en Litovio. Tio ne estas malbona, sed laŭ la origina intenco BET estas komuna aranĝo de la tri baltaj landoj [...]

Sekvontjare okazos jubilea BET.  Al ĝi invitis   samideaninoj el Latvio Biruta kaj Margarita:
Ni esperas, ke sekvontjare ni ankaŭ sukcesos organizi enhavriĉan kaj interesan la BET-50 (2014 06 28-07 04), kaj invitas vin ĉiujn al Jelgava (Latvio) .

Laŭ Heroldo de Utena, La Balta Ondo

La plej bona urbestro estos alta protektanto de BET-49

En taks-indeksa tabelo de la plej bonaj urbestroj de Litovio, kiun kompilis semajna revuo Veidas (Vizaĝo), la plej altan lokon okupas urbestro de Utena socialdemokrato Alvydas KATINAS. En la triopon ankaŭ eniras urbestro de Akmenė sampartiano Vitalijus MITROFANOVAS kaj urbestro de Palanga konservativulo Šarūnas VAITKUS.

Rimarkinde, ke urbestro de Utena Alvydas Katinas akceptis la proponon esti alta protektanto de la 49aj Baltiaj Esperanto-Tagoj (BET-49). Distingo de la urbestro permesas esperi, ke BET-49 ĝuos ĉiu-flankan helpon kaj kunlaboron de la urba gvidantaro.

La urbestro, kiel li mem diris, ŝatas ludi per sia familinomo (ka'tinas – litove kato). Li ofte donacas poŝtkarton, el kiu rigardas serioza oficialulo kun granda bruna kato apude. La konciza subskribo komentas: La urbestro estas la unua maldekstre.

Alvydas Katinas laŭ  profesio estas  instruisto de litova lingvo. Li estas aŭtoro de kelkaj poeziaj libroj, membro de Litova Verkista Unio. 

Artistoj ankaŭ  ne ignoras ĉi tiun temon. Ekzemple, Agnė Pečaitė Stankevičienė tiel ŝerce imagas la urbestron.

(Laŭ Veidas, Respublika, keramikosmenas.com, Litova E-Asocio)

Tabelo de BET-oj

Dum sovetia periodo BET-oj por niaj esperantistoj anstataŭis Universalajn Kongresojn de Esperanto, kiujn partopreni por sovetianoj estis tre malfacile kaj foje tute neeble. 

Unue la aranĝo nomiĝis Ĉebaltaj Esperantistaj Tendaroj (ĈET), poste Baltiaj Esperanto-Tendaroj (BET) kaj finfine fariĝis Baltiaj Esperanto-Tagoj (BET). 

Necesas mencii, ke el BET-oj evoluis ankaŭ SEJT-oj (Sovetiaj Esperantistaj Junularaj Tendaroj). Estas interese, ke SEJT-oj komencis sian vivon en Litovio kaj ne de la unua, sed ekde komenco de la 9-a, ĉar en 1967 BET-9 okazis en ĉefurbo de Litovio Vilnius kaj samtempe junuloj aranĝis la unuan junularan tendaron en Kaltanėnai (Litovio), kiu ricevis titolon SEJT-9. 

Dum la jaroj BET-oj kreskis al tutsovetia aranĝo kaj post sendependiĝo de Baltiaj landoj ĝi jam fariĝis vere internacia kaj kreskis al preskaŭ tuteŭropa esperantista aranĝo. BET-oj ankaŭ anstataŭis Baltiajn Esperanto-asociojn, kiujn oni ne eblis fondi en sovetia periodo, do, BET-oj servis kiel ia konstanta organiza kaj kunlabora formo por esperantistoj de tiutempaj Baltiaj respublikoj de Sovetunio. BET-oj komencis organizitan Esperanto-movadon en baltiaj landoj dum sovetia periodo.  

(El komento de Povilas JEGOROVAS)

La diagramo  montras varion de nombro de partoprenantoj (NP) en BET-oj (musklakinte sur la diagramo, vi ekvidos pligrandan bildon). La diagramo estas kompilita laŭ donitaĵoj de la malsupra tabelo.

Verŝajne oni ne povas fari iajn profundajn konkludojn, tamen certan dinamikon oni povas rimarki.

Post la unua BET-o en 1959 (48 partoprenantoj) sekvis 4 BET-oj (ĝis BET-5 en 1963 kun 288 partoprenantoj), dum kiuj NP kreskis. Tio estis plej longa "pozitiva" periodo, poste NP variis "supren-malsupren" preskaŭ alterne. Nur post BET-11 (1969) sekvis kvar-BET-a falo ĝis 102 partoprenantoj en BET-15 (1974).

Plej granda NP (608) estis atingita en BET-26 (1989). Tamen post 4  jaroj (en BET-29, 1993) ĝi falis al nivelo de la unua BET-o (50 partoprenantoj).  La fenomeno ripetiĝis pasintjare: en BET-48 partoprenis  44 samideanoj. Tio estas malrekordo de BET-oj.

En la diagramo ni vidas  pintojn kaj  malpintojn (aŭ laŭ matematika terminaro – lokajn maksimumojn kaj minimumojn).

Absoluta plimulto de la pintaj nombroj karakterizas partoprenon en la BET-oj, kiuj okazis en Litovio. Nur unu litova BET-o (BET-6, 1964)  havas  malpintan  NP.

Ĉi-jare Baltiaj Esperanto-Tagoj okazos en Utena. Statistiko de BET-oj  kun  probableco de 87% permesas atendi, ke la diagramo pafiĝos supren!

Tabelo de BET-oj
(Aranĝo, Tempo, Loko, Nombro de partoprenantoj)

ĈET-1	1959 08 01–10	Baltezers, Latvio	48
ĈET-2	1960 08 01–10	Kääriku, Estonio	107
ĈET-3	1961 08 01–10	Molėtai, Litovio	204
ĈET-4	1962 08 01–10	Drabeši, Latvio	238
BET-5	1963 08 04–11	Värska, Estonio	288
BET-6	1964 08 01–10	Veisiejai, Litovio	153
BET-7	1965 07 30–08 08	Saulaine, Latvio	171
BET-8	1966 07 05–15	Pärnu, Estonio	117
BET-9	1967 08 01–10	Vilnius, Litovio	337
BET-10	1968 07 27–08 05	Ruba, Latvio	194
BET-11	1969 08 10–16	Viljandi, Estonio	400
BET-12	1970 08 01–10	Kretinga, Litovio	316
BET-13	1971 08 06–15	Smiltene, Latvio	189
BET-14	1972 08 01–10	Häädemeeste, Estonio	170
BET-15	1974 08 02–04	Rīga, Latvio	102
BET-16	1975 07 25–08 03	Helme, Estonio	222
BET-17	1976 07 30–08 10	Viekšniai, Litovio	241
BET-18	1977 07 23–31	Rēzekne, Latvio	223
BET-19	1978 07 15–23	Kehra, Estonio	174
BET-20	1983 07 01–10	Noreikiškės, Litovio	358
BET-21	1984 07 06–15	Kuldīga, Latvio	299
BET-22	1985 07 03–10	Kose, Estonio	450
BET-23	1986 07 10–19	Smalininkai, Litovio	472
BET-24	1987 07 12–19	Saulaine, Latvio	406
BET-25	1988 07 24–31	Tallinn, Estonio	350
BET-26	1989 08 12–20	Noreikiškės, Litovio	608
BEK-27	1990 07 10–19	Jelgava, Latvio	435
BET-28	1991 07 08–15	Tartu, Estonio	422
SAT-65	1992 08 05–15	Noreikiškės, Litovio	452
BET-29	1993 07 09–17	Priekuli, Latvio	50
BET-30	1994 07 23–30	Pärnu, Estonio	100
BET-31	1995 07 08–16	Girionys, Litovio	203
BET-32	1996 08 02–10	Jūrmala, Latvio	208
BET-33	1997 08 03–09	Haapsalu, Estonio	162
BET-34	1998 07 17–24	Veisiejai, Litovio	253
BET-35	1999 07 18–24	Liepāja, Latvio	163
BET-36	2000 07 03–09	Tallinn, Estonio	201
BET-37	2001 07 07–15	Noreikiškės, Litovio	303
BET-38	2002 07 07–14	Rīga, Latvio	182
BET-39	2003 08 10–14	Tartu, Estonio	76
BET-40	2004 07 11–17	Birštonas, Litovio	257
BET-41	2005 07 15–21	Rīga, Latvio	150
BET-42	2006 07 04–08	Kuresaare, Estonio	137
BET-43	2007 07 14-22	Šiauliai, Litovio	322
BET-44	2008 07 05–12	Ventspils, Latvio	151
BET-45	2009 07 08–12	Paikuse, Estonio	121
BET-46	2010 06 26-07 04	Visaginas, Litovio	185
BET-47	2011 07 09–16	Mālpils, Latvio	116
BET-48	2012 07 04–08	Pala, Estonio	44