Pinavia - novtipa stratkruciĝo

Stanislovas BUTELIAUSKAS, lektoro pri trafika administrado en Litova Milit-Akademio de Generalo Jonas Žemaitis, kreis kaj patentigis novtipan stratkruciĝon. La aŭtoro sian inventaĵon baptis Pinavia. En litova lingvo ĝi asociiĝas kun popola nomo de floro peonio (litove pinavija).

De kutimaj trafikcirklaj stratkruciĝoj Pinavia diferencas je tio, ke torentoj de sur ĝi veturantaj aŭtoj ne kruciĝas. Ĝi estas dunivela kaj garantias la saman trafikan kvaliton,  kiel en kvarnivela multetaĝa stratkruciĝo.

Kutiman stratkruciĝon post dudekoj da jaroj ekde la konstruado oni devas rekonstrui, ĉar kiam en iu loko pliboniĝas kondiĉoj de veturado, intensiĝas ankaŭ la trfiko.

Nian stratkruciĝon ne timigas grandaj trafiktorentoj, ĉar  forminte ĉiudirekte po 2 trafikzonojn, "Pinavia" iĝas preskaŭ duoble pli tralasiva ol vojo. Kutima stratkruciĝo estas 3-4-oble malpli tralasiva ol vojo, – eksplikas s-ro Buteliauskas.

Matematikistoj de Vilna Universitato kalkulas, ĉu indas konstrui Pinavia'n en certa loko. Docento Rimvydas KRASAUSKAS kreis algoritmon, kiu helpas apliki la stratkruciĝon al konkretaj kondiĉoj, prikalkuli probablan prezon.

Avantaĝoj de Pinavia:

• Granda ĉiudirekta tralaso;
• Sekureco: trafiktorentoj ne kruciĝas, oni nebezonas ŝanĝi trafikzonojn, oni povas veturi je konstanta rapideco;
• Ĝi konservas la medion, ĉar ne formiĝas trafikŝtopiĝoj, konstanta rapideco certigas rapidan traveturon kaj plejmalgrandan konsumadon de fuelo kaj plejmalgrandan poluadon de la medio. Laŭ arkitektura vidpunkto, la stratkruciĝo ne frapas la okulojn, ĉar la viaduktoj povas esti en sama nivelo kun la vojo;
• Ĝi estas universala, ĉar oni povas ĝin apliki al 3-, 4- kaj eĉ 5-vojaj kruciĝoj; al vojoj samkategoriaj kaj diverskategoriaj; al la dekstra kaj maldekstra trafiko;
• Ĝi estas plej malmultekosta en sia klaso. Ĝi plenumas la samajn funkciojn kiel ankaŭ kvarnivela trafiknodo, tamen la konstruado estas duoble malmultekosta.

Malavantaĝo

• Estas necesa grandarea tereno. Ekstera diametro (D) dependas de projektata rapideco (v). Ekzemple, kiam v = 40 km/h, tiam D = 153 m; kiam v = 105 km/h, tiam D = 915 m.

Ĉi tiu malavantaĝo povas esti utila, ĉar bonega enveturo en mezon de la trafiknodo povas grave pligrandigi valoron de la interna tereno.